澳职一路扩充版图，今季会增加一队西部联（West United）至11队，下季联赛再会有Macarthur FC加入。新军西部联位于墨尔本西部，将会用两个唔同球场作为主场，阵中最瞩目球员必然係「澳职战神」贝利沙。
经验老将贝利沙孭飞
西部联波衫以绿同黑为主，灵感嚟自西部丛林嘅颜色，主场係绿黑间条，作客波衫係白底绿色同黑色碎花设计。将会穿起呢件新波衫嘅，包括征战澳职多年嘅科索沃前锋贝利沙。贝利沙曾经协助布里斯班狮吼同墨尔本胜利取得常规赛同季后赛冠军，经验够晒丰富。34岁嘅贝利沙上年加盟广岛三箭，但不受重用，决定重返澳职。
贝利沙嘅进攻拍档将会係意大利中场迪亚文迪，呢名36岁浪人足迹遍及欧亚，曾经效力韦斯咸、博洛尼亚、广州恒大、巴勒莫等，左脚出色嘅迪亚文迪可司职左翼或「假9」位置，但随住年纪渐老，慢慢趋向校炮。
