3度带英超队首骚例赢
寸王回归，英超从此多事！热刺喺国际赛期间辞退普捷天奴，聘用豹隐1年嘅名帅摩连奴领军，好多球迷都非常期待，起码就算场波唔好睇，场外花边新闻都一定精彩先。摩连奴过往3次执教英超球会，包括两教「车仔」及上次嘅曼联，首骚例必赢波，乐比深信今场都唔例外，热刺作客韦斯咸，让半一捧上盘。
（Now 621及611周六晚8时30分直播）
普捷天奴突然落镬，令唔少球迷意外，毕竟佢几个月前先带队杀入欧联决赛，而且连续4季企稳联赛前4，甚至冲击过英超冠军，以热刺嘅资源加上英超Big 6嘅竞争环境，可谓超额有馀。可惜热刺今季大脱脚，令班主利维怒炒普帅，不过一切已成过去，倒不如聚焦番摩连奴能否带领热刺取得突破。
摩连奴最厉害嘅地方当然係捧盃嘅效率，职业生涯共攞过20次锦标，几乎每季都无宝不落，虽则近年常被批评回塘，但佢差极喺对上两次执教过程中，都帮「车仔」攞过联赛冠军及帮曼联捧过欧霸盃，佢有名你叫「摩三季」，即係头两季通常都仲满足到班主。再者摩连奴擅于激励球员士气，呢个特质正正係热刺目前最需要嘅，毕竟「艾历臣事件」令热刺部分主力出现离心，「寸王」嘅气场足以压得住班球员，始终热刺队波係有质素，只要解决心魔，短期内反弹唔成问题。
颓爆韦斯咸防守多漏洞
主队韦斯咸陷入低潮，已经7场不胜，佢哋今季赢过嘅3场赛事当中，其中两仗只係屈福特及诺域治两支榜尾球队，睇怕领队比历连尼都唔捱得几耐。「锤仔帮」目前最大问题係防守极多漏洞，后备门将罗拔图信心不足，两闸艾朗加斯威尔及赖恩费特历斯经常进退失据，面对注重细节嘅摩连奴，恐怕会成重点攻击目标，热刺作客咁曳都要让半一，摆明有信心。
