周中嘅英超快车刚上演默西赛德郡打吡，利物浦以5比2击败爱华顿，稳守联赛榜1哥位置。今个星期嘅英超赛事，亦会有另一场打吡战爆发，就係今晚曼城主场迎战曼联。面对同市宿敌曼联，再无失分空间嘅「蓝月亮」，今场将会搏尽抢分。
拉舒福特脚风顺
曼联周中英超凭拉舒福特梅开二度，主场以2比1击败热刺，排名回升至联赛榜第6位。呢位红魔射手近况不错，喺各项赛事近13场共取得12个入球，今季对Big 6球队4场赛事中，更交出5个入球及1个助攻，令曼联今季对Big 6暂时保持不败。不过红魔作客成绩不济，对上11场英超作客赛事只得1胜4和6负，只有对诺域治能够赢波，今场作客曼城球场绝对係一场硬仗。
曼城落后榜首利物浦11分，与排第2位嘅李斯特城都相差3分，佢哋上轮作客般尼大胜4比1，今场係曼市打呲，对球队而言，绝对係延续士气嘅重要赛事。虽然曼城近况不稳，近6场赛事只取得2胜3和1负，但主场成绩仍然不俗，近6场主场赛事5胜1和。对上27场英超主场赛事，更加赢咗24场，一共射入81球，攻力强劲。主帅哥迪奥拿6次喺英超领军面对曼联，取得4胜1和1负，曼城亦于上季联赛双杀同市死敌，相信今仗会拚尽全力。
