今届欧联分组赛来到最后一轮，虽然有部分组别嘅出线席位已尘埃落定，但亦有其他组仍要斗生斗死，以H组形势最为激烈，其中「3哥」车路士主场迎战里尔，嚟到呢类生死关头，我相信经验、战意兼备嘅车仔，可以大胜晋级。（有线656及616台周三凌晨4时直播）
里尔欧洲赛任人鱼肉
虽然车仔只排第3位，但查实与「2哥」华伦西亚同分，落后榜首阿积士2分，由于后两者今轮正面交锋，至少一队会失分，即係话车仔只要赢波，就唔使理嗰边嘅任何赛果，肯定取得其中一个晋级席位，必定搏老命。相反，里尔应该冇乜战意，佢哋唔单止已经出局，仲只得1分排包尾，连争第3转战欧霸嘅机会都冇埋，翻查纪录，计埋之前嘅球季，原来里尔近16仗欧洲赛（欧联+欧霸）未赢过，令佢哋成为欧战史上不胜纪录最长嘅法甲球队，可谓任人鱼肉。
既然目标鲜明，我觉得2012年欧联盟主、上届亦捧走欧霸嘅车仔，可以大炒对手出线。仲有一样值得留意，係车仔少帅林柏特崇尚进攻，唔会因为领先紧便缩后保住胜果，反而争取扩大比数，充满娱乐性，因此可预计今仗会上演入球骚。
