现今球坛最高水準、最扣人心弦嘅顶级球会盃赛──欧联分组赛今晚来到煞科日，查实好多组别嘅出线席位都名花有主，今轮多场比赛变成例行公事，不过唔代表冇好戏码，讲到最有睇头及博彩价值嘅梗係D组，Peter喺度同读者研究一下。
祖记或遣副选上阵
喺剩番今晚Last一轮情况下，D组榜首祖云达斯领先次席马德里体育会4分，已经提早锁定首名出线，而排第3嘅利华古逊则只係落后马体会1分，出线仲未绝望。既然祖记今轮赢、输、和都冇所谓，唔排除主帅沙利会派遣副选应战，今轮作客利华古逊梗係捧唔过喇。相反利华仲有一线生机，老虎蟹一定搏尽，佢哋之前喺德甲作客都赢到拜仁，实力绝对唔曳，对住胜负无关痛痒嘅祖记有埋地利之助，战意鲜明下值博率更高。
至于同组马德里体育会主场对莫斯科火车头，由于佢哋仍然掌握出线主动权，只要今仗赢波即可晋级，就算另一边利华赢100球都冇用，况且火车头笃定包艇，连争第3「降格」打欧霸资格都冇埋，唔慌会搏，嚟到呢个阶段战意行先，马体会值得睇高一线。不过要留意马体会求出线唔使大炒，以主帅施蒙尼偏重防守嘅打法，可能小胜算数。
