龙格保领军防线崩坏
今晚英超压轴战，阿仙奴主场对曼城。阿仙奴自龙格保接手后，终于喺执教第3场开斋，但枪手嘅防线问题并未解决，场场失波当食生菜，喺新帅未上任之前，后面肯定继续「走火」，今晚面对攻力强劲嘅曼城，相信会有大手交易场面，乐比简单拣个大盘，中位数3.5球有1.82倍。
（Now 621及611周一凌晨零时30分直播）
阿仙奴辞退艾马利后，好多人都寄望看守领队龙格保会带来新景象，但自打和诺域治2比2及主场不敌白礼顿1比2后，球迷开始失去耐性，希望球会尽快搵新领队「坐正」，目前呼声最高係前拿玻里教练安察洛堤，次热则係今场对手曼城助教兼前阿仙奴队长阿迪达，无论係边个上任都好，乐比认为阿仙奴应尽快落实新教头，拨乱反正，因为球员普遍对龙格保已失去信心。
事实上，阿仙奴近年最大问题係来自防线，但龙格保上任后唔单止冇改善，仲令情况恶化，执教4场已失咗7球，首仗起用梅斯达菲已孭晒镬，之后发现大衞雷斯都係毒瘤嚟，最近起用哥林张伯斯同柏柏斯达夫普路斯，虽然两人都质素平庸，但起码踢法正路啲先，不过如果阿仙奴唔正视防线同中场间嘅协调，吓吓「厂」门大开，前面入几多都冇用。
两军射手质高态勇
曼城今季确实冇上季「三料冠军」咁勇锐，目前落后榜首嘅利物浦14分，不过论攻击力曼城仍然係英超之冠，单计入球率每场2.75球，其实比上季夺冠时更优胜。即使阿古路今仗继续因伤倦勤，但加比尔捷西斯、史达宁嘅入球触觉唔需要怀疑，其中加比尔捷西斯刚于上周中欧联连中三元，今场係时候骚哥利。
睇番曼城近年都真係食住对手，近5次交手都赢两球或以上，而阿仙奴今季对Big6未赢过都真係冇晒符，不过枪手嘅进攻能力始终有番咁上下本钱，奥巴美扬今季入11球脚风甚顺，兼且拿卡锡迪今季5个入球全部来自主场，相信都可以喺曼城身上入波，波胆不妨向曼城赢3比1及4比1埋手。
