唔知大家见到金句时，会否有一头雾水嘅感觉呢？虽然截稿前未知周六英超嘅赛果，但我从来都是其是、非其非，唔会讲一些可能、好有机会等呢类明哲保身嘅说话，我认为气势如虹嘅利物浦笃定夺得今季英超锦标，因为能够阻挡佢哋嘅曼城失分太多，睇吓去到季尾，我嘅预言能否成真。
至于欧联方面，同样喺截稿前仍未进行16强抽籤，但我相信列强亦唔想抽到对利物浦，一来红军实力强劲，二来其高压迫打法愈趋成熟，纵然可以其人之道，採取同一招数对付佢哋，但又有几多支球队能全场贯彻呢种打法呢？仲未计红军于冬窗添兵力图增强实力，近日不断传出佢哋会签入萨尔斯堡嘅日本好波之人南野拓实嘅消息，假如属实真係如虎添翼。
而且红军班主约翰亨利一反常态，儘管佢同时拥有美职棒球队波士顿红袜，但佢讲到明资金会留畀利物浦增兵之用，希望一圆30年以来首尝英格兰顶级联赛冠军滋味，甚至考虑将部分红袜球员卖出套现，可见呢位美国班主非常重视红军。加上日前更急急与主帅高普续约多2年，意味住佢会执教到2024年，确可稳定军心，以上种种，都係对球队长远嘅规划，难怪红军近年不断进步，逐渐进入收成期。
吼爱华顿狼队下盘
讲番今晚英超，曼联主场对爱华顿，红魔今季坚係海鲜波，时好时坏，爱华顿绝对有力一战，同时间亦有热刺主场对狼队，热刺就算自摩连奴接手后有起色，但非战无不胜，狼队总係以蔗渣价钱、踢出烧鹅味道，因此我睇好受让嘅爱华顿同狼队下盘。
