今晚英超爆发曼市打吡战，曼联自冬季转会窗收购波基斯费南迪斯后，成队波脱胎换骨，无论状态同士气都升至全季最高位，反观曼城连踢两场盃赛，加上心繫欧联，决心不及「红魔鬼」。曼联主场受让半一可再下一城，乐比捧下盘！
（Now 621及611周一凌晨零时30分直播）
波基斯费南迪斯只为曼联披甲7场，但已被誉为近年最佳收购，因为佢係曼联近年一直欠缺嘅中场大脑人物，喺佢嘅穿针引线下，成功激活咗其他队友，每个球员落场都有明显进步，尤其喺佢推前半格踢进攻中场后，曼联嘅进攻威力更大，唔会再好似以前咁老鼠拉龟，难怪所有曼联球迷都话可以忘记普巴。
波基斯费南迪斯嘅另一贡献，係令到费特洛迪古斯、尼曼查马迪可以更专注防守，间接令曼联嘅防守力提升。费南迪斯上阵嘅7场比赛中，有5场曼联係保持清白之身，成队波攻守都平衡咗，曼联依家已保持9场不败，係全季状态最好嘅时候，呢个时候硬撼曼城绝对係好时机！
格食格今季两胜曼城
事实上，曼联嘅快速反击踢法对强队係有优势，除今季两胜曼城、三胜车路士外，喺如日方中嘅利物浦身上亦取得1分，反观曼城作客强队表现麻麻，先后输过畀热刺、狼队及利物浦，睇嚟真係似格食格。
未计周六晚比赛，曼城联赛落后榜首利物浦22分，领先第3嘅李斯特城则有7分，争标机会近乎冇，第二位置又稳如泰山，今季联赛对佢哋嚟讲意义已唔大，佢哋喺上周末联赛盃决赛以2比1险胜维拉捧盃，周中足总盃对英冠嘅锡周三都係小胜1比0，呢两场盃赛都消耗咗唔少体力，今场係佢哋连续第5仗非主场赛事，未必保持到最佳水準，加上中场大将奇云迪布尼有伤上阵成疑，「蓝月亮」今场确存在唔少隐忧。
