衝欧联无望兵工厂侧侧膊
近期联赛3连败嘅阿仙奴，争入前4嘅目标已经愈趋渺茫，领队云格亦扯晒白旗，摆明会将精力放喺欧霸盃身上，今晚英超主场迎战「大黄蜂」屈福特，随时会被黄蜂尾后针拮死。客队自从查维加西亚接手后成绩爆升，对住冇晒斗志嘅阿仙奴有力取得佳绩，捧下盘最好路。
阿仙奴上轮输畀白礼顿后，距离第4位嘅热刺13分，入前4几乎肯定冇行，阿仙奴依家尽地一煲抢欧霸盃，周中作客意大利激斗AC米兰后，4日后又要应付次回合赛事，今晚呢场波可以话系「例行公事」，球员战意至少打个5折。唔好忘记阿仙奴踏入2018年后，9场联赛只赢过2场，Hea踢之下仲有乜争胜信心呢？
作客嘅屈福特就岩岩相反，佢的自从1月请到查维加西亚执教后，成队波当堂生猛晒，呢位西班牙教头上任后，屈福特喺5场联赛拎到3胜1和1负成绩，主场4比1大炒车路士更加系今季代表作，罗拔图佩雷拉、李察利臣、杜哥利等实而不华球员个个都踢出水准，状态可以话今季最弗时刻。
箭头迪尼专恰阿仙奴
另外，步大力雄嘅屈福特箭头迪尼可以话系「阿仙奴剋星」，佢喺今季首循环同上季次循环都成功攻破「兵工厂」大门，呢2场波「大黄蜂」都赢2比1，迪尼仲公开批评阿仙奴球员系冇胆匪类，摆到明有信心食住阿仙奴，今仗要抢分而回冇难度，今场仲有得受让一球，下盘笋到爆。
