今晚另一场欧霸16强次回合焦点战，由俄超「5哥」辛尼特主场对德甲劲旅RB莱比锡。辛尼特于首回合输1比2，想出线今仗非胜不可，好彩佢的主场坚恶，撞正近况麻麻嘅RB莱比锡，有力赢波收复前失，平手盘一于捧辛尼特。
辛尼特喺首回合以1比2败走，但攞到1个作客入球，今场只要赢1比0即可出线，有见及此，主帅文仙尼喺上仗联赛收起射手高哥连、中场艾美兰奴列干尼等主力，前者喺今届欧霸有9粒进帐，可养精蓄锐备战今仗。呢支俄超「5哥」主场坚恶，近5仗欧霸主场出击，唔单止喺法定时间赢晒，而且全部喺上半场取得领先优势，由头赢到落尾坚抢缰，包括上圈对些路迪，首回合作客输0比1之下，返自己地头大胜3比0出线，主场威力不容小觑。
莱比锡态沉经验不足
另边厢，RB莱比锡近况麻麻，联赛连盃赛，近6仗只得1胜2和3负，加上喺欧洲赛经验不足，上圈欧霸作客赢拿玻里3比1，返主场竟输0比2，仅仅凭作客入球较多出线坚惊险，今仗造访2008年欧洲足协盃盟主（欧霸前身）嘅辛尼特，凶多吉少，平手盘必捧辛军。
