粉丝众多嘅英格兰今晚将作客荷兰，虽然「三狮兵团」阵中有唔少球星，不过王牌射手哈利卡尼缺阵下，冇人担得起数胡重任，而且英格兰创造力不足问题未解决，对住同样守强攻弱嘅荷兰随时闷战一场，1.66倍入球细属正路之选。
哈利卡尼缺阵 修夫基头痕
英格兰踢热身赛成绩认真麻麻，对上5场热身赛3和2负未赢过，上年底对住德国同巴西都闷和0比0，睇战果唔算失礼，但亦反映到「三狮」创造力不足嘅问题，今次点兵「哈神」哈利卡尼受伤未有入选，无论主帅修夫基用占美华迪、韦碧克定拉舒福特，都畀唔到人信心，日前操练就有指班前锋唔多识入波，令修帅劲头痛。
缘尽世界盃嘅荷兰上月请嚟名宿朗奴高文执教，今仗系佢上任后首骚，当然唔想失威。志切重建嘅荷兰都有唔少新面孔，包括名将之后祖斯甸古华特有机会处子登场，不过荷兰中后场似乎更可靠，队长华基尔云迪积克领导防线表现唔曳，荷兰近3场比赛冇失过波，绝对唔赦「冇牙狮子」。
