神锋犯华做东岂可失威
国际赛档期神锋访华大斗法！第2届「中国盃」今晚喺广西南宁市开打，今届可谓星味十足，除由纳比领军嘅东道主国足之外，仲重金邀请到威尔斯、乌拉圭及捷克3支劲旅参赛，4路大军以淘汰赛形式，决出王者。威尔斯快翼加里夫巴利、乌拉圭两大射手苏亚雷斯同卡云尼都有随军出战，星味爆灯，戏码足以同欧洲赛场分庭抗礼！
今晚中国盃揭幕战，东道主国足迎战「欧洲红龙」威尔斯。威尔斯刚由曼联名宿杰斯接手帅位，「系龙系虫」仲有待观察；牌面较弱嘅国足近年对住欧洲球队都大打守势波，搞到对手前锋冇啖好食，近9次全开2球或以下，威尔斯未必可大胜而回，大细中位数调整至2/2.5球，照捧1.66倍细盘。
今个赛事国足可谓派出最强人脚应战，包括主力后卫冯潇霆，同联赛开咧脚风劲顺，以7个入球领先中超射手榜嘅前锋武磊，配合一班常规军如黄博文及郜林等，战力唔算曳，不过张琳梵临开波前因伤离队外，老将郑智亦伤愈冇耐未够弗，冇入选今次大军名单，缺少呢两位中后场核心，主帅纳比相信会「睇餸食饭」，先求守住后防，再睇下有冇机会打突击。
杰斯初带威尔斯未知「龙定虫」
威尔斯阵容尚算完整，只得艾朗蓝朗因伤落选，效力皇马嘅前锋加里夫巴利同热刺后卫宾戴维斯都有随队，宾戴维斯赛前更表明刨熟晒武磊啲入波片，冇话因为级数高就轻敌。不过佢的今场想大胜有难度，尤其面对摆明「泊大巴」嘅国足，「屈」惯速度嘅巴利未必会有空位发挥，加上今仗属杰斯首次带领威尔斯嘅正式比赛，执教经验同临场应变都输晒畀纳比，喺时候交吓学费，细盘捧得过。
