铭记世盃1:7血仇
今晚国际热身赛爆发复仇之战，巴西作客柏林火併德国。巴西喺上届世盃大败畀德国七个一皮，堪称国耻，今仗誓要报番一箭之仇，但德国一班边缘人如马里奥高美斯等为博打世盃，亦会当决赛咁踢，斗攻格局实多波入，一于捧中位数2.5球嘅入球大。
堂堂足球王国，巴西在上届世盃有主场之利下，竟喺4强以1比7惨败畀最终成为盟主嘅德国，绝对系奇耻大辱，虽然今仗对德国只系热身赛，但如此大仇足足等左4年终于有得报，誓要赢波挽回面子，战意唔使怀疑。就算王牌尼马重伤要抖到世盃先复出，但以「耶稣」加比尔捷西斯、菲腊比古天奴、韦利安为首锋线一样咁煞食，后两者日前大胜俄罗斯3比0之役都有士哥或助攻，仲有擅次后上入楔嘅中场悍将荷西保连奴，攻力强劲。
近3次交锋炮製18个入波
另一边厢，德国喺日前同西班牙「拍跳」虽然打和1比1，但双方踢得几开放，阵中除左安利简恩受伤退队外，2大主力奥斯尔及汤马士梅拿亦获免役提早返球会报到。不过咁样唔代表实力受削，因为「日耳曼兵团」人才济济，尤其系前锋线，只有迪姆华拿几乎肯定有份打世盃，其馀嘅马里奥高美斯、辛度华拿及史甸度，为博打世盃都要争崩头，预计今仗会获得上阵机会，梗系要趁机入多几粒争取表现，连同要争正选嘅曼城孖宝根度简及利莱辛尼，火力全开唔系人咁品，乘住巴西复仇心切挂住进攻，德国随时有更多空位打反击。加上双方近3次交手，合共炮製18个士哥，全开3球或以上，相信今仗会合演入球骚，捧大盘最划算。
