3支大炮开火抢上岸
今晚英超独脚戏上演护级大战，由「锤仔帮」韦斯咸主场硬撼尾2嘅史笃城。「锤仔帮」未上岸，今仗仲要抢分，前线阿拿奥杜域近期回勇频有货交，面对军心大乱兼连场不胜嘅史笃城，可挟地利赢波，1.88倍主胜有计。
早前3连败嘅韦斯咸一洗颓风，先大胜护级劲敌修咸顿3比0，上仗作客逼和车仔抢番1分，未计周日赛事，「锤仔帮」累积34分排第15位，距离传统「安全线」40分仲差6分，比「降班区」尾3嘅修咸顿及今仗对手史笃城多6分同7分，仲未安全上岸，所以今仗必以赢波3分为目标，顺便踩多史笃城一脚再甩远啲，战意必坚。适逢前线嘅阿拿奥杜域近2仗入2粒，上仗又为「小豌豆」查维亚靴南迪斯交出助攻，重拾佳态，咁岩大旧佬中锋安祖卡路尔又好番可候命，主帅莫耶斯有咁多支大炮唔愁冇波入。
客队铁腕治军削兵源
另一边厢，史笃城内部问题多多，主帅林拔採取铁腕政策，荷兰翼锋阿费利因训练坚Hea被雪藏，而超过2年冇波入嘅前锋比拉希奴，近期被贬落U23，喺依家需要用人之际，林拔咁做值得商榷，连同近4仗联赛输晒，严重打击士气。何况前锋祖普莫亭有伤在身上阵成疑，中场老将查理阿当续坐波监，造访抢分心切嘅「锤仔帮」，凶多吉少，主胜不容错过。
