欧联出局一肚气
西班牙盃决赛今晚爆发，西维尔将会同巴塞隆拿喺新建成嘅万达大都会球场一决高下。西维尔虽然求胜心切，不过状态飘忽，实难有力同对手周旋，相反巴塞欧联8强止步后，肯定全力争西盃，球队近年面对西维尔往绩优势明显，今仗让1/1.5球照捧上盘。
西维尔今季啲「海鲜波」真系搞到班球迷（抓）晒头，皆因呢班波有能力喺欧联16强技术性击溃英超强敌曼联，发挥惊人潜力，同时又可以喺联赛畀实力麻麻嘅雷加利斯赢番转头，令人怀疑球队嘅稳定性，可见主帅蒙迪拿依然未能有效控制队波，尤其一班防线主力成日出现注意力唔集中嘅毛病，呢场面对有多位攻击好手坐镇嘅巴塞，西维尔肯定会暴露弱点。
往绩食住西维尔
巴塞喺欧联8强止步后，主帅华尔维迪难免要承受唔少压力，不过一味声讨呢位今季先至接掌教鞭嘅教头，实在有欠公平，皆因巴塞今季喺本土赛事战绩彪炳，表现有目共睹，唔应该用一时胜负论英雄。
「地上最强」今场战意十足，队中除左进攻核心美斯同苏亚雷斯状态上乘，继续交出超班表现外，最近连新兵菲腊比古天奴都交到货，似乎已经融入球队打法，进一步加强巴塞进攻能力，而且巴塞近6次同西维尔交手，取得5胜1和，尤其近两次盃赛碰头巴塞都大获全胜，往绩佔尽优势，今仗有望再取佳绩，一吐欧联出局嘅乌气。
