送别云格mode启动！阿仙奴老帅云格日前宣布季尾离任，今晚英超主场迎战「锤仔帮」韦斯咸，相信众将都希望喺馀下赛事尽力争胜，令「云爷爷」好头好尾光荣告别，挟主场5连胜嘅强势，今仗有力炒起韦斯咸，让一球照捧上盘。
虽然阿仙奴紧接就要出战欧霸4强首回合对马体会，但老帅云格日前宣布今季季尾离任，结束长达22年嘅「厂长」生涯，联赛连欧霸在内，今仗对韦斯咸，系云格倒数第3仗喺主场酋长球场领军，呢一刻无论系本身「迷云」定「反云」粉丝，以及全队上下，都希望馀下赛事踢得好好睇睇，令「云爷爷」可体面地离开，战意唔使怀疑。而且若阿仙奴继续失分，畀般尼过头跌落第7位嘅话，下季就要出战欧霸外围赛，大大影响球队新球季备战。
韦斯咸上岸战意鬆懈
另一边厢，韦斯咸嘅护级之路已经差唔多「上岸」，球员斗心或会有所鬆懈，而且佢的近5仗作客赛事只系得1和4负，门将赫特更频频犯错，搞到成条防线都冇晒信心，今仗作客酋长球场凶多吉少。阿仙奴已启动送别云格mode，亦想喺出战马体会之前大胜振军心，加上近5仗主场又赢晒，让一球照捧上盘。
