往绩恰圣人基奥特大勇
今晚温布莱球场上演英格兰足总盃4强大战，车路士硬撼「圣人」修咸顿。车仔前锋基奥特状态大勇，加上近年交手佢的都食住修咸顿，呢场有力赢波挺进决赛，车路士上盘捧得过。
干地上季带领车路士重夺英超王位，仲一举掀起343阵式嘅复兴热潮，影响深远。不过好景不常，车仔今季各条战线都先后冧档，继欧联同英联盃出局之后，英超仲频频失分，好可能连前4都保唔住，痛失下季欧联入场券，对失望嘅车仔球迷嚟讲，干地季尾「落车」早已成定局，不过佢话晒系功勳教头，冇功都有劳，相信车仔众将为捧盃肯定会搏尽，令呢位意大利教头可以光荣告别。查实车路士上届英足盃都杀入决赛，只系最终不敌靠盃「续命」嘅云格所领军嘅阿仙奴，今季睇好佢的卷土重来。
修咸顿志在护级难分心
修咸顿继2003年后再次挺进英足盃4强，可惜「圣人」自新帅晓士接手后表现都仲系咁曳，班波依然未摆脱联赛榜下游位置，护级形势十分严峻，边会有心情兼顾盃赛，况且佢的近5次面对车仔全部输晒，包括前几日喺联赛先取得2球大好局面情况下，畀车仔杀手基奥特梅开二度，最终输返2比3，明显畀车仔食住，呢场睇怕都凶多吉少。
