齐争升班搏甩髀
英冠今晚爆发升班大战！力争附加赛资格嘅打比郡主场迎战「二哥」卡迪夫城，今场比赛原本喺3月中举行，不过因为大风雪而改期，依家两队都为升上英超搏晒命，令呢场补赛更加有睇头。卡迪夫城尚差两场胜仗就可以重返英超，争胜意欲超强，对住有前冇后嘅打比郡，「大」有机会合演入球骚！
打比郡季中开始一直佔据联赛前6位，甚至有超过1个月时间高踞第2位，不过季尾突然大跌Watt，早前经过联赛3连败后，已经跌落第7位，要抢番附加赛资格（前6位）的话，今仗实在不容再失。事实上打比郡近6次主场出击只赢过1仗，虽然每场比赛都有波入，但可惜当中合共失左11球，防守差系打比郡致命伤，既然守唔住，要抢分唯有靠狂攻搭救。
2500粉丝随卡城征战
卡迪夫城近两仗分别击败诺域治及诺定咸森林，如今重上联赛第2位，领先第3位嘅富咸1分兼少踢1仗，意味卡迪夫城只要喺最后3仗当中赢2仗，就可以攞到直接升班资格，目标明确战意肯定一流，而且2,500个威尔斯Fans已经买晒飞随队出征打气，「第12人」威力势必令攻击力不俗嘅卡迪夫城踢得更加进取，今仗捧入球大最好不过。
