今晚系德甲倒数第二轮，9场比赛同时开波，当中科隆对拜仁慕尼黑预期会系一场精彩入球骚，拜仁已笃定德甲6连霸，可惜岩岩喺欧联力战下，两回合以3比4不敌皇家马德里，4强止步无缘决赛，不过拜仁表现一啲都唔失礼，两回合赛事计点数同埋门威胁比皇马更优胜，只可惜伤兵多导致阵容不整，个别位置合作出现问题，防线犯错较多，老帅轩历基斯都话输得唔抵。今晚重返德甲，虽然轩帅想畀部份主力休息，但好多正选都请缨上阵，希望大胜一吐欧联饮恨乌气，轩帅向来亦擅于处理危机，拜仁喺两星期后就要踢德国盃决赛，呢段时间攞番自信好重要，球会亦将联赛6连霸庆祝活动推迟喺德国盃决赛翌日至举行，呢一刻佢的仍然唔会放软手脚。
猛将共患难 科隆主场谢幕
至于科隆虽已笃定降班，不过经过一段时间已经消化左悲痛，近期球会不断传嚟好消息，两位领袖级球星队长祖拿斯赫达同门将汉恩都带头同球会共患难，放弃左原本合约上列明若降班可以廉价800万欧元转会嘅条款，双双同科隆续长约至2023年，佢的亦感染其他阵中主力，包括中场马素怀斯同马高贺查，都表明愿意随队落德乙。科隆亦成功撬得今季德乙神奇球队基尔嘅主帅安方下季过档，力争带领球队尽速重返德甲。今晚系科隆降班前最后一场主场比赛，又面对班霸拜仁，众将喺冇压力下誓要踢番场争气波，佢的过去3场主场赛事分别击败利华古逊、赛和缅恩斯同史浩克，合共轰入5球，有一定还手能力，今晚有决心同拜仁驳火，推介中位数3.5球大盘。
