国家打吡睇准先嚟料
今晚嘅「西班牙国家打吡」原本系球坛大事，但今季情况有啲特别，主场嘅巴塞隆拿晨早喺联赛封王，作客嘅皇家马德里亦锁定前4位置，加上全副心机放喺欧联，作战心态未必十足，堂堂大战变例行公事。两队近年交手惯睇定嚟踢，2.7倍半和玩得过。
今季西甲次循环国家打吡安排喺尾2一轮上演，相信赛会如意算盘系希望今场变做冠军终极战，可惜事与愿违。事实上巴塞上轮赢波后提早封王不特止，今季长期喺联赛放到「甩晒辘」，远远抛离包括皇马在内嘅一班追兵。今季先上任嘅主帅华尔维迪可谓功不可没，门将达史特根早前就咁评价呢位教头：「以前佢经常带队同巴塞过招，加盟球队后，佢可以用外来人嘅身份弥补我的不足。」巴塞依家追求嘅只系全季联赛不败，就算对住死敌都唔使急于抢攻，宁小心应战。
近7次交手6开半和
皇马卫冕联赛早早无望，自然将精力摆晒落欧联度，尤其距离「欧联3连霸」呢个惊人成就只差一步，主帅施丹梗识分轻重，对住巴塞都唔慌会搏。皇马首循环主场淨吞巴塞3蛋，加上岩岩喺欧联同拜仁搏斗完，体力上较输蚀，今场自然稳阵行先，两队近7次交手有6次半场不分胜负，半和值得支持。
