德国盃决赛今晚上演，拜仁慕尼黑同法兰克福喺中立场柏林奥林匹克体育场争霸，班霸拜仁牌面当然赢条街，不过法兰克福今季屡遭拜仁欺凌，令原本十分美好嘅球季变成随时一无所有，今仗遇仇人就算唔够打都搏甩髀鍊到尽，誓要爆冷抢盃兼抢下届欧霸入场券，预期会系一场对攻好戏，推介2.02倍嘅中位数3/3.5球大盘。
法兰克福喺尼高高华带领下，踢出近年最好一季，今年二月底更一度高踞联赛榜三甲，争下届欧战入场券原本成竹在胸，点知去到4月13日噩耗传来，拜仁喺未有知会法兰克福嘅情况下，单方面宣布会喺今夏买断尼高高华合约，呢位主帅下季将会接替轩歷基斯执教拜仁，法兰克福体育总监波碧闹爆拜仁喺呢个时候宣布消息打击士气，结果法兰克福最后5场联赛输左4场，排名跌到第7位。
捧唔到盃今季将一无所有
德甲前4名可以参战欧联，第5同第6名参战欧霸盃，至於仲有一个欧霸盃名额，将会系德国盃冠军，如德国盃冠军球队已获欧战入场券，则由联赛第7名代替。法兰克福由於杀入德国盃决赛，佢的只要保住第7，本来仲可以稳得欧霸盃参赛权，点知拜仁煞科日再玩野，竟然喺主场捧盃大日子以1比4惨败畀原本第8位嘅史特加，令史特加最终以两分差距反超法兰克福抢走第7位，换言之法兰克福今晚必须捧盃至可以保住欧霸资格，教练尼高高华今晚决定以3412进取阵式同强敌驳火，希望创造奇迹。
拜仁德甲6连霸，今晚向双料冠军进发，并送别73岁传奇教练轩歷基斯，今仗虽然有谢路美保定、维达尔、洛宾同京士利高文等主力养伤，牌面仍然远胜对手，轩帅亦计划排出433阵式主攻，两军上月底喺德甲交手，拜仁主场赢4比1，既然法兰克福作客安联都入到波，今晚喺中立场豁出去一拼，好大机会同拜仁再演入球骚。
