又老又乱咬唔入瑞典
今晚世盃头场上演F组赛事，北欧劲旅瑞典斗亚洲代表「太极虎」南韩。瑞典今届凭出色嘅稳守战术，先后喺外围赛及附加赛踢走荷兰及意大利，踢法擅守不擅攻；南韩喺今届外围赛演出差强人意，匆匆上任嘅主帅申台龙亦未搵到心目中嘅最佳阵容，加上老将当道踢法料会稳阵至上，波童建议捧2.5球嘅细盘。
瑞典领队赞尼安达臣可能系今届世盃委员会嘅眼中钉，事关佢先喺外围赛踢走粉丝多箩箩嘅荷兰，再喺附加赛淘汰4届冠军意大利，然后连瑞典「国宝」伊巴谦莫域毛遂自荐入队佢都唔理，不断为今届世盃决赛周赶客，大大减弱左今届比赛话题性同吸引力，认真倒米。
唔选伊巴 瑞典玩稳守突击
不过倒米还倒米，赞尼安达臣能够领军淘汰两大劲旅绝对唔系符碌，其中附加赛主、客两回合更成功「零封」意大利，可以睇到佢嘅稳守突击战术非常成功，如果勉强加入伊巴谦莫域，随时打乱原有部署，恐会得不偿失。瑞典决赛周前2场热身赛同以0比0赛和丹麦及秘鲁，踢法唔见太大突破，预计今届仍以稳守踢法跟列强周旋。
南韩今届喺亚洲区外围赛12强赛只以次名出线，现任主帅申台龙喺外围赛尾声，临时拉伕顶替史泰历克掌帅印，虽然能保住决赛周席位，但之后热身赛演出仍未畀到球迷信心，特别系防线一时用3后卫、一时用4后卫，令球员无所适从。南韩出战决赛周前3场热身赛只得1和2负，合共仅入1球。最攞命嘅系，23人大军绝大部份都系「3字头」老将，活力欠奉，就算孙兴民「踢到晓飞」都冇用。睇埋往绩，南韩对上3届决赛周5次面对欧洲球队，总入球全部开2球或以下，面对踢法同样主守嘅瑞典，难有大量入球出现，捧细盘岩数。
