摩洛哥0分焗攻
今晚世盃头场爆发B组次轮关键战，由葡萄牙硬撼摩洛哥。葡军虽然上仗赢唔到，但王牌基斯坦奴朗拿度(C朗)大演帽子戏法，系过去3次参加世盃嘅士哥总和，真系脚风顺到冇朋友，摩洛哥上仗临尾香冇分落袋，为晋级今仗要焗攻抢W，撞正防线不稳嘅葡萄牙，好大机会合演入球骚，2.5球大盘有计。
葡萄牙上仗凭王牌C朗连中三元，最终于3比3逼和劲敌西班牙保住1分，呢位队长成为世盃决赛周史上最老帽子戏法嘅球员，亦系继巴西球王比利、德国两位名宿施拉及高路斯之后，另一位连续4届世盃有波入嘅球员。C朗1场就入3粒，系佢过去3届世盃士哥嘅总和，脚风坚顺。而呢3球中有12码、远射及罚球，板斧甚多，嗰个扳平罚球时速达96.5公里嘅惊人速度，个波由射出到入波只系0.82秒，非常夸张，考虑到C朗年纪已经有3张几，愈老愈弗实在令人佩服。
葡萄牙防线穿晒窿
另一边厢，摩洛哥上仗对伊朗一直「窿对窿」，谂住和波收场，点知后备入替嘅前锋布夏迪斯却误摆老乌，最终输0比1坚唔抵，1分都冇依家排包尾，落后「双牙」1分及榜首伊朗3分，为出线今仗不容再失，势必抢攻争胜，不过谷得太上，随时畀弗爆C朗有机可乘。话说回来，葡萄牙上仗两番领先下，竟一度畀「狂牛」反先3比2，最终各三言和算系大话夹好彩，而中路守将比比及荷西方迪转身太慢，防线穿晒窿，面对焗攻嘅摩洛哥，势必大手交易，大盘有买趁早。
