稳守突击攞完秘鲁着数
世盃C组第2轮分组赛，周四晚上丹麦将会喺萨马拉球场面对澳洲。丹麦上仗靠犀利嘅防守反击，击败秘鲁取得首胜，效果奇佳，相反喺上仗畀法国击败嘅「袋鼠军团」质素欠奉之馀，仲不嬲畀欧洲球队剋住，呢场睇怕都难同丹麦周旋，捧番主胜好过。
面对攻势猛烈嘅秘鲁，丹麦防线喺上仗世盃首战可以话系承受左巨大压力，仲因此输左球12码畀对手，好彩秘鲁未能将呢个绝佳机会转化为入球，不过丹麦防线整体发挥其实唔曳，尤其有卡斯柏舒米高把守最后一关，后防绝对够晒稳阵，呢位效力李斯特城嘅门神，嗰场就多次作出神救，状态弗爆。而且丹麦除左有密集防守之外，反击效率都非常之高，上仗虽然射门次数不及对手秘鲁，不过前锋尤素夫保臣靠住一次快速反击，就一射中鹄置对手于死地，睇得出佢的班前锋几有威胁，加上基斯甸艾历臣、汤马士迪兰尼同薛斯图等球队主力，都系喺欧洲主流联赛揾食，质素有保证，实力比起澳洲梗系佔优。
澳洲决赛周怕左欧洲兵
澳洲首战虽然1比2仅败法国，不过表现唔算太差，只系攻守水平实在同欧洲顶级球队依然有距离，佢的近6次喺世盃决赛周面对欧洲球队，就有5次输波，呢场形势都不容乐观，都系捧主胜更稳阵。
