拒做四零部队秘鲁唔会缩
周二晚上C组最后一轮，澳洲同秘鲁会喺索契菲施特奥林匹克球场正面交锋。「袋鼠军团」想出线除左要寄望丹麦喺另一场输波外，自己都要争气数爆秘鲁。另边厢已出局嘅秘鲁为免做「四零部队」，今仗都会努力抢士哥，中位数2.5球嘅入球大咪走宝！
卡希尔有望正选救国
澳洲上仗逼和丹麦抢番1分，虽然保住出线希望，不过暂时排第3嘅「袋鼠军团」，晋级形势十分被动，皆因呢场面对秘鲁佢的除左要争取大胜外，仲要睇埋另一场丹麦对法国嘅赛果。不过与其寄望对手失分，不如自己加多两钱肉紧踢好啲，由于前锋纳博特受伤，老牌射手卡希尔好大机会喺呢场生死战正选披甲。卡希尔过去3届决赛周上阵都有收穫，仲系澳洲国家队「士哥王」，入波能力有番咁上下，加上有弗爆前锋马菲历基为佢输送弹药，呢位38岁老将随时再做救世主。
已笃定出局嘅秘鲁，其实过去两场踢得唔差，尤其前场以进攻核心基斯甸古华为首嘅攻击组合，多次创造出具威胁嘅攻势，可惜运气欠佳，现时落得「零胜零和零分零入球」嘅田地，不过睇得出球队进攻质素绝对唔差，尤其秘鲁已阔别决赛周36年，今届难得重返世盃大舞台，唔会甘于空手而回做「四零部队」，随时同澳洲驳火，中位数2.5球嘅大盘有买趁早。
