形势唔急 睇定嚟踢
世盃C组最后一轮赛事，2支欧洲代表丹麦、法国正面对撼。丹麦只要多取一分便肯定以次名出线，法国和波亦可稳夺首名，所以今场和波赔率赛前已急跌至2.3倍，不过波童对于会否再次出现2004年欧国盃丹麦、瑞典「疑似默契波」有保留。丹麦近6场国际赛全开半场和，对住有机会收起部分正选嘅法国，大可继续睇定嚟踢，博半场和更稳阵。
要数近年最经典「疑似默契波」，一定系2004年欧国盃分组赛，当年丹麦、瑞典于最后一轮分组赛打和2比2，以对赛较多入波「合力」踢走意大利，今次主角又系丹麦。丹麦现时以3分领先澳洲，今场和波就唔使理会另一边厢澳洲对秘鲁赛果，肯定以小组次名晋级，2战全胜手执6分嘅法国，今场只要唔输亦可以首名出线，所以今场和波赔率，已由原本最初开售时嘅3.15倍急跌至2.3倍。
丹麦锋将停赛先求稳
不过波童对两队会否喺众目睽睽之下，再次合力「炮製」和波战果始终有保留，何况对丹麦嚟讲，如果澳洲喺同时间开波嘅比赛赢唔到秘鲁，佢的其实输波都可以晋级，既然今场有主力锋将尤素夫保臣累积2面黄牌停赛，进攻力打折扣，相信丹麦会一如过去比赛一样，初段稳打稳扎为主，留待换边后先发力。
法国随时留力淘汰赛
法国头2场分组赛皆以1球差距击败对手，表现未算太标青，特别系「3基」基沙文、基奥特及基利安麦巴比仲未好好融合，经常出现各自为战，进攻有待改进。而且为留力应付淘汰赛，有黄牌在身嘅保罗普巴、马度迪及哥伦天杜利素今场都有可能被收起，喺作出轮换嘅情况下，法国想喺初段攞到甜头亦唔容易，今场半场和赔率虽然只得1.63倍同样偏热，但比起直接取和应更加稳阵。
